Press "Enter" to skip to content

Kad Artiklo 13 povos nocar l’Internet?

Balde, l’Europana Uniono votos pri la propozita direktivo* polemikal: Directive on Copyright in the Digital Single Market. Ye la 20a junio 2018, la komitato di legal aferi aprobis la propozo senegarde la desquieteso dil Internet-komunitato e la parlamento projetas votor pri la fina decido ye la 12a septembro ca yaro1 2.

La nova direktivo — unesme propozita ye la 14a septembro 20163 — kreesis por harmoniigor l’autoryuro trans singla stati di Europa4. La bezono por nova direktivo venis pro l’indijo di lego morderna ed aktualigita5, e vizas plumodernigor la yuro por la digitala evo6. La maxim recenta aceptita direktivo (e ta qua prezente efikesas) pri autoryuro — la Copyright Directive — adoptesis ye la 22a mayo 20017, e duros efikar til ke nova propozo aceptesus.

La nova direktivo vizas plubonigor la kunlaboro inter la servado-provizeri e l’autoryuro-tenanti, e plubonigor la balanco di rekompenso inter li.8 To povus koaktar platformi kam Netflix plu pagar la firmi qua a lin licencas sua filmi e serii.

La kauzo pro la granda debato e desquieteso del Internet-komunitato esas pro la 13a Artiklo. Artiklo 13 koaktus la servado-provizeri di enlinea platformi kam Reddit ed altra forumi inspektar singla faili qua kargesus a sua situi ed impedar ti qui povus kontravencar la nova lego autoryura ante li divenus disponebla, od impedus l’uzero adjuntar la korekta licenco.9 10 11 Mem se la tenanti dil autoryuri ne kontaktus kun o kontaktigus la provizeri, la provizeri disponus la yuro blokusar irgo segunvole e senquestione se li opinionus ke ol kontravencar la nova lego. Semblas anke, ke la nova lego povus aplikesar e punisar kontravencanti diferante, dependante del grandeso di la platformo.12

Europa klozanta la vulto 13 kun famoza karakteri ofte uzata en memi ye l’altra latero dil vulto-pordo.

Pro to, l’Internet-komunitati kredas e timas, ke ta direktivo povos ocidar (od adminime multe nocar) memi e la memo-kulturo.13 Li avertas, ke Artiklo 13 nocus la difuzeso di parodia kontenajo e memi qua, dum ke ol esas original e kreiva labori, ofte developesas ek original kontenajo da altra homi. Li anke avertas e timas, ke granda firmi povus kontrolar quon ni vidos ed agos enlinee per ta povo.14 Kom protesto, « memeri » kalquas la fundo di sua memi vice uzar l’original; kam la suba tweet.

On ne povas censuresar se on ne uzas autoryure protektita materii — kalquita versiono dil famoza memo Roll Safe15.

Anke la Wikimedia fonduro (Wikipedia) e la Mozilla komuneso (la populara webnavigilo Firefox) montris sua opinioni e la posibla chanji e noco la lego povus duktar a sua platformi.16 17

En julio (l’original voto-dato final) la propozo refuzesis da la majoritato di voti. Li decidis vartar kelkete pluse e projetas votor un final foyo ye 12a septembro.18


* direktivo: en politiko dil Europana Uniono, direktivo esas « legifal akto qua kreas skopo por singla membra stato Europana quan li mustas atingar. Tamen, singla lando individual mustas inventar su propra legi por atingar ta skopo ».19

Por saveskar pluse pri la nova direktivo, on povas vizitar la webpagino dil Europana legaro: EUR-Lex.Europa.eu por o lektar Internet-e o deskargar dokumente la direktivo en irga ek l’ofical lingui dil Europana Uniono.

Ka vu prizis ta artiklo? Difuzez ol:
  1. CNET.com (Angle) — 03.07.18
  2. EuroParl.Europe.eu (Angle) — 03.09.18
  3. EC.Europa.eu (Angle) — 30.06.18
  4. CNET.com (Angle) — 30.06.18
  5. EUR-Lex.Europa.eu (Angle) — 30.06.18
  6. Consilium.Europa.eu (Angle) — 03.07.18
  7. EUR-Lex.Europa.eu (Angle) — 30.06.18
  8. Consilium.Europa.eu (Angle) — 03.07.18
  9. EUR-Lex.Europa.eu (Angle) — 30.06.18
  10. CNET.com (Angle) — 30.06.18
  11. PrivateInternetAccess.com (Angle) — 30.06.18
  12. Consilium.Europa.eu (Angle) — 03.07.18
  13. BusinessInsider.com (Angle) — 30.06.18
  14. News.Sky.com (Angle) — 04.09.18
  15. KnowYourMeme.com (Angle) — 30.06.18
  16. Meta.Wikimedia.org (Angle) — 03.07.18
  17. ChangeCopyright.org (Angle) — 03.07.18
  18. NakedSecurity.Sophos.com (Angle) — 03.09.18
  19. Europa.eu (Angle) — 30.06.18

Esez l'unesmo komentar

Komentar

Vua eadreso ne esos publikigata. Bezonata feldi esas markizita per *.