Ransomware qua infektas la tota mondo

Hiere, 12-ma mayo 2017, nova ransomware WannaCry (Angliana slango por «Ka tu volas plorar?»), o WanaCypt0r, infektis komence komputeri di hospitali en Britania e komputeri di la Rusiana interna ministraro, ma pose difuzis a preske la tota mondo.

 

«malware» esas malicoza programo qua nevole instalas su en vua komputero. Malware povas nocar vua komputero, o furtar informo.

 

«ransomware» (o «malware di ransono») esas malware qua anke klefagas vua komputero e forsan anke enkriptigas o mem efacas faili di vua komputero. Ransomware ne lasas vu acesar vua komputero, vicee postulas ke vu pagas li ransono por riganar aceso a vua komputero. Remarkez, ke pos pago, la ransomware forsan ne ridonos vu aceso a vua komputero.

 

La ransomware explotachas l’exploto EternalBlue. EternalBlue, reportante developesis da NSA, explotas vundebla sekureso-problemi di anciena komputeri uzante Windows. La exploto divulgesis da la hakero-grupo The Shadow Brokers en aprilo. Microsoft informas ke li ja korektigis l’exploto, ma anciena komputeri qua ne akutaligesis esas ankore vundebla.

 

Kande WannaCry instalas su en la selektita komputero, la ransomware kelfagas la tota komputero ed enkriptigas omna de la faili. Pos to, la ransomware postulas ransono di 300 dollars en la moneto komputerala bitcoin. La ransomware subkontas, e kande la ransomware parsubkontis, la ransono duopligas a 600 dollars. Pos l’infekto, WannaCry povas difuzar su en la LAN ad altra komputeri.

 

Pos la komenco di la difuzo, entote 99 landi reportas intruzesir en plu kam 75.000 komputeri segun Avast, Chekiana sekureso-firmo.

 

(WannaCry difuzas en universitato-laboratorio. Til nun, dum 15 hori ta ransomware infektis preske 100.000 komputeri mondale.)

 

Se vu uzas komputero uzante anciena operacosistemo (kam Windows XP) od irgo qua ne aktualigesis dum longa tempo, rekomendesas instalar plu recenta versiono dil operacosistemo vel aktualigar a la lasta rapeco. Anke, pro ke WannaCry povas difuzar su en la LAN, rekomendesas ekligar la komputeri del Interreto.

 

WannaCry infektesis la staciono-terminali en Germania.

Post Author: William Johnsson

Saluto. Me nomesas William. Me prezente esas la sola redaktero di Jurnalo... ma to forsan chanjos uldie. Me esas Suediana Idisto depos 2015 ed amas skribar en Ido.

Leave a Reply

Your email address will not be published. Required fields are marked *